Европа Иттифоқи Австралия билан эркин савдо тўғрисидаги музокараларни кечиктирди
Бунга Канберранинг француз сувости кемаларидан воз кечиши асосий сабаб қилиб кўрсатилмоқда.
ЕИ ва Австралия ўртасидаги савдо музокараларининг 12 раунди октябрда ўтказилиши керак эди. Аммо маълумотларга кўра, баъзи ҳал қилинмаган масалалар туфайли уларни ҳозирда давом эттириб бўлмайди. Шу билан бирга ноябрда музокараларни давом эттириш мумкинлиги маълум қилинди. Ушбу жараёнга яқин манбалардан бири ҳодиса айнан француз сувости кемалари билан боғлиқлигини айтган.
Австралия савдо вазири Дэн Тэхан ҳозирда Европада бўлиб турибди. Унинг таъкидлашича, музокаралар вақтинчалик қолдирилди, бутунлай бекор қилингани йўқ. Тэхан келгуси ҳафта Парижга боради. Аммо унинг француз ҳамкасби Франк Ристер билан учрашиши маълум эмас. Ҳозирга қадар Франция ишбилармонлари иттифоқи — MEDEF Австралия вазири билан учрашувини бекор қилган.
Маълумот ўрнида: 16 сентябрь куни Австралия АҚШ ва Буюк Британия билан янги ҳарбий альянс –– AUKUS тузганини эълон қилди. Шундан кейин АҚШ Канберрага атом сувости кемаларини етказиб беришга ваъда берган. Бу Франция билан 56 миллиард европалик шартноманинг бекор қилинишига олиб келди. Оқибатда Франция АҚШ ва Австралиядаги элчиларини чақириб олган.
Аввалроқ Франция ЕИнинг Австралия билан эркин савдо тўғрисидаги келишувига қарши чиққани ва Хитой янги ҳарбий альянс қуролланиш пойгасини кучайтириши ҳақида баёнот бергани хабар қилинганди.
