Франция ЕИнинг Австралия билан эркин савдо тўғрисидаги таклифига қарши чиқди

 

Франция ТИВ давлат котиби Клеман Боннинг сўзларига кўра, "Ваъдасининг устидан чиқиш — демократик давлатлар ва иттифоқчилар ўртасидаги ўзаро ишонч гарови саналади. Мадомики шундай экан, ишончни йўқотган давлат билан эркин савдо тўғрисида келишишдан ҳеч қандай маъно йўқ". Франция Австралиянинг сувости кемалари бўйича 56 миллиард евролик келишувни бекор қилиши сабабли шундай баёнот берди.

 

 Европа Комиссияси ЕИ аъзолари номидан исталган савдо музокараларини олиб бориш ҳуқуқига эга. Аммо унинг Париж қарорига очиқ қаршилик қилиши эҳтимоли кам.

 

Европа Парламенти Халқаро савдо бўйича қўмита бошлиғи Бернд Ланге фикрича, Франциянинг Австралия билан низоси Канберра билан эркин савдо масаласини мураккаблаштирган. Бу Европанинг бошқа давлатлари, хусусан, Германия иқтисодий манфаатларига ҳам путур етказмоқда. Масалан, AUUKUS тузилиши Германиянинг Atlas Electronic компаниясига таъсир этган.

 

Маълумот ўрнида: 16 сентябрь куни АҚШ Буюк Британия ва Австралия билан ҳарбий ҳамкорликни кенгайтириш юзасидан келишувга эришди. Унга кўра, уч томонлама киберхавфсизлик, флот ва бошқа соҳаларда ҳамкорлик йўлга қўйилади. Шунингдек, Австралияга атом сувости кемалари берилади. Бунга жавобан Хитойнинг АҚШдаги элчиси Вашингтондан совуқ уруш даврини эслатадиган фикрлардан воз кечишни талаб қилди.

 

Эслатиб ўтамиз, бундан аввал Франция Вашингтон ва Париждаги элчиларини чақириб олган эди.

 

 

Жаҳонгир Қўзиев