Viloyat hokimi Qobul Tursunov otasi va oila aʼzolari bilan birgalikda Karmana tumanidagi 64-saylov uchastkasiga tashrif buyurib, o‘zi munosib deb bilgan nomzodga ovoz berdi.
Mazkur saylov uchastkasida 2 ming 453 nafar saylovchining ro‘yxati shakllantirilgan bo‘lib, pandemiya sharoitidan kelib chiqib, karantin talablariga rioya qilingan holda ovoz berish jarayoni davom etmoqda.
– “Yangi O‘zbekistonda yangi saylovlar” shoiri ostida o‘tayotgan Prezident saylovi yurtimizda eng muhim siyosiy tadbir bo‘lib, ertangi kunimizni, mamlakatimiz rivoji va xalqimiz farovonligini belgilab beradi. Qolaversa, ushbu tadbirda har bir fuqaromiz faol ishtirok etib, o‘z huquqidan foydalangan holda o‘zi munosib deb bilgan nomzodni qo‘llab-quvvatlashi kerak, – dedi Qobul Tursunov.
Qayd etilishicha, viloyatdagi 11 ta saylov uchastkasida, jumladan mazkur saylov uchastkasida ham saylov jarayonlarini onlayn kuzatish imkoniyati mavjud.
Eslatib o‘tamiz, O‘zbekiston Respublikasi Prezidenti saylovida O‘zbekiston Liberal-demokratik partiyasidan ko‘rsatilgan nomzod Shavkat Mirziyoyev Mirzo Ulug‘bek tumani Alisher Navoiy mahallasidagi 59-saylov uchastkasiga tashrif buyurib, ovoz berish jarayonida ishtirok etgandi.
Bundan avval O‘zbekiston Ekologik partiyasidan prezidentlikka nomzod Narzullo Oblomurodov, "Milliy tiklanish" demokratik partiyasidan prezidentlikka nomzod Alisher Qodirov, O‘zbekiston “Adolat” sotsial-demokratik partiyasidan prezidentlikka nomzod Bahrom Abduhalimov hamda Xalq demokratik partiyasidan ko‘rsatilgan nomzod Maqsuda Vorisova Uchtepa tumani 116-maktabdagi 206-saylov uchastkasida ovoz bergani haqida xabar bergan edik.
Shuningdek, Toshkent viloyati hokimi Davron Hidoyatov, Qashqadaryo viloyati hokimi Zoyir Mirzayev, Samarqand viloyati hokimi Erkinjon Turdimov, Farg‘ona viloyati hokimi Xayrullo Bozorov, Surxondaryo viloyati hokimi To‘ra Bobolov hamda 126 yoshli Xuvaydo momo o‘zi tanlagan munosib nomzodga ovoz bergani haqida xabar berilgandi.