Toshkent viloyati Olmaliq shahrida is gazidan zaharlanish oqibatida o‘lim holati qayd etildi. Bu haqida Bosh prokuratura axborot xizmati xabar berdi.
Maʼlum qilinishicha, shahar IIB navbatchilik qismiga 23 yanvar kuni Zarbuloq mahallasida yashagan, 1974 yilda tug‘ilgan D.X. (ayol) vafot etgani haqida xabar kelib tushgan.
Tarmoqlarda tarqalgan xabarlarda aytilishicha, ayol tunda gaz plitasiga suv to‘la idishni qo‘ygan, ammo birozdan so‘ng o‘zi uxlab qolgan. Idishdagi suv qaynab tugagan bo‘lsa ham, gaz yonishda davom etgan.
Ayolning eri uyg‘onib ketgach, gazni o‘chirgan, unda ham zaharlanish alomatlari bo‘lgan va shifoxonaga yotqizilgan.
Ekspertizaga ko‘ra, marhumaning o‘limi o‘tkir is gazidan zaharlanishdan yuzaga kelgan o‘tkir yurak-qon tomir va nafas yetishmovchiligi oqibatida vafot etgani ko‘rsatilgan.