Qayd etilishicha, bu borada 18 ta investitsiya bitimi imzolangan. Mazkur stansiyalar amaldagi elektr energiyasining 50 foizini ishlab chiqaradi.
2021-yilda Toshkent viloyati Qibray tumanida umumiy quvvati 710 MVt bo‘lgan 3 ta issiqlik elektr stansiyasi, Xorazm viloyatining Yangiariq tumanida 2021-yil dekabr oyida quvvati 174 MVt bo‘lgan issiqlik elektr stansiyasi foydalanishga topshiriladi.
2023 yilda Navoiy viloyati Karmana, Nurota va Tomdi tumanlarida umumiy quvvati 800 MVt bo‘lgan 3 ta quyosh va bitta shamol elektr stansiyasi, Samarqand viloyati Nurobod va Kattaqo‘rg‘on tumanlarida esa umumiy quvvati 320 MVt bo‘lgan 2 ta quyosh fotoelektr stansiyasi ishga tushiriladi.
Jizzax viloyati G‘allaorol tumanida quvvati 220 MVt bo‘lgan quyosh fotoelektr stansiyasi, Sirdaryo viloyati Yangiyer va Shirin shaharlarida quvvati 720 MVt bo‘lgan 2 ta issiqlik elektr stansiyasi qurib bitkaziladi.
2024-yilda Buxoro viloyatining Peshku, G‘ijduvon va Buxoro tumanlarida umumiy quvvati 1 270 MVt bo‘lgan issiqlik va shamol elektr stansiyalari, Qoraqalpog‘iston Respublikasining Qorao‘zak tumanida quvvati 100 MVt bo‘lgan shamol elektr stansiyasi ishga tushiriladi.
2025-yilda esa Surxondaryo viloyati Sherobod va Angor tumanlarida umumiy quvvati 2 017 MVt bo‘lgan quyosh va issiqlik elektr stansiyasi ishga tushiriladi.
Bundan avval Qirg‘izistonda kuz-qish mavsumida ko‘cha chiroqlari o‘chirilayotgani, bu yilgi kuz-qish mavsumida mamlakatimizda elektr energiyasi qanday holatda bo‘lishi hamda Surxondaryo va Xorazmda elektr stansiyalari qurilishi haqida xabar berilgandi.
Olamgir Abdiyev