Унда айтилишича, мазкур тизим куз ва қиш мавсумида амалда бўлади.
Қирғизистон Миллий энергетика раиси Талайбек Байгазиевнинг журналистларга маълум қилишича, уй хўжалиги бўлмаган абонентлар электрдан оқилона фойдаланмаяпти. Мазкур хулоса электр энергияси истеъмоли таҳлилидан келиб чиққан.
“Тўғри, битта лампочка ҳеч нарсани англатмайди. Лекин бундай лампочкалар бутун мамлакат бўйлаб миллионлаб. Бунинг оқибатида, яхшигина ҳаражат келиб чиқади. Айримларимизнинг ҳовлимизда бир нечта лампочка бор. Эътибор беринг, тунги кафе ёнида 100 та чироқ ёниб туради, гарчи улар “ЛЕД” лампалари бўлса ҳам. Мазкур лампалар ҳам қарийб 7-8 ватт энергия сарф қилади. Уларнинг ҳаммасини қўшиб кўринг-чи, қанча бўлади?
Қишлоқ ҳокимияти ҳар йили қарийб 100 миллион киловатт-соат электр энергияси истеъмол қилади. Шу жойда ҳам ёруғлик тундан тонгача ёниб туради. Парк майдонларида ҳамма нарса эрталабгача ёнади. Хўш, умуман, ким эрталабгача юради? Оддий одамнинг белгиланган вақти бўлади. Яъни, соат 22.00-23.00 гача пиёда юриш, кейин ухлаш”- дея тушунтирган расмий.
Эндиликда қўшни республикада тунги истироҳат боғлари ва кафеларнинг кўча чироқлари ҳамда реклама ёритгичлари ўчирилади. Бироқ бу билан қанча электр энергияси тежалиши ҳақида аниқ маълумот берилмаган.
"Бизнинг халқимиз тежамкор ва бунга тез кўникади. Йўллар ёритилишини ўчиришга келсак, ярим тундан кейин асосан иккинчи даражали кўчалар ўчирилади. Пойтахтнинг асосий йўллари ва марказий кўчалари ўчирилмайди. Итоатсизлик учун жазо қўлланмайди. Энди сиз кондиционер тизимидан воз кечишингиз мумкин. Гап хонадонларда электр токини ўчириш ҳақида кетмаяпти, лекин пулни тежаш фойдадан холи эмас”, - дея хулоса қилди Миллий энергетик холдинги раҳбари.
Бундан аввал Сурхондарё ва Хоразмда электр станциялари қурилиши, Самарқандда 100 миллион долларлик фотоэлектр станцияси яқин ойларда қуриб битказилиши ҳамда бу йилги куз-қиш мавсумида мамлакатимизда электр энергияси қандай ҳолатда бўлиши ҳақида хабар берилганди.
Оламгир Абдиев