Ma'lum bo'lishicha, yong‘in sabab yerda yashab kelgan migrantlardan 4 nafari halok bo‘lgan, 2 nafari esa jarohat olgan. Ularning barchasi O‘zbekiston fuqarolaridir.
Vafot etganlar shaxsiga aniqlik kiritilgan. Ular — Otaqulov Shokir O‘roqboyevich (1969 y.t), uning o‘g‘li O‘roqboyev Eldor (1998 y.t), Kubayev Sherali (1987 y.t) va Rahmatov Alisher (1998 y.t) ekani aniqlangan.
Hozirda vafot etgan yurtdoshlarimiz jasadlarini O‘zbekistonga qaytarish choralari ko‘rilmoqda.
Maʼlumot uchun: Yong‘indan jabrlangan ikki nafar yurtdoshimiz Solnechnogorsk markaziy kasalxonasiga yotqizilgan.
Tashqi mehnat migratsiyasi agentligining Moskva shahridagi vakolatxonasi hodisa yuzasidan Rossiya Favqulodda vaziyatlar vazirligi bilan aloqa o‘rnatgan. Yong‘in sabablari o‘rganilmoqda. Hodisa yuzasidan tergov harakatlari olib borilmoqda.
Rossiya Federatsiyasi Favqulodda vaziyatlar vazirligining Moskva yaqinidagi bosh boshqarmasi matbuot xizmati xabariga ko‘ra, yong‘in Moskva vaqti bilan 10:27 da boshlangan, 15:40 da to‘liq o‘chirilgan.
Eslatib o‘tamiz, avvalroq Tolyattidagi xostelda 23 nafar O‘zbekiston fuqarosi zaharlangani hamda Rossiyada o‘zbekistonlik fuqarolar nomaʼlum moddadan zaharlanib, vafot etgani haqida xabar berilgandi.
Bahriniso Madumarova