Kecha, 24-noyabr kuni “Toshkent-Markaziy” vokzalida Rossiyadan O‘zbekistonga yetib kelgan poyezdning kutib olish marosimi bo‘lib o‘tdi.
Maʼlumot uchun, “Agroekspress” loyihasi O‘zbekiston Respublikasi va Rossiya Federatsiyasi o‘rtasidagi ikki tomonlama hamkorlikni kengaytirish doirasida, logistika koridorlarini rivojlantirish maqsadida amalga oshirildi. Mazkur loyiha O‘zbekiston, Qozog‘iston va Rossiya temir yo‘llari ishini birlashtirgan. Kelgan yuk muzlatkichli konteynerlarda TsNA (Rossiya Federatsiyasining Janubi-Sharqiy temir yo‘l) yuk stansiyasidan Qozog‘iston orqali tranzit yo‘l bilan Sergeli stansiyasiga (“O‘zbekiston temir yo‘llari” AJ) olib kelingan.
Poyezd Toshkentga muzlatilgan parranda go‘shti partiyasini yetkazib berdi. Tajriba sifatida konteynerlar partiyasi chegara va bojxona tartib-qoidalaridan o‘tishni, marshrut bo‘ylab tovarlar xavfsizligi sifatini sinovdan o‘tkazish imkonini berdi hamda keyingi qatnovlargacha yuklarni yetkazib berish jarayonini soddalashtirish va takomillashtirish imkoniyatlarini ko‘rsatdi.
Taʼkidlash joizki, mamlakatlar o‘rtasida “Agroekspress”ning barcha texnologik va nazorat masalalari ishlab chiqilgandan so‘ng ular muntazam va to‘laqonli bo‘ladi.
Avvalroq, O‘zbekiston va Afg‘oniston ikki tomonlama munosabatlarni rivojlantirishga qaratilgan “yo‘l xaritasi”ni ishlab chiqishi hamda endilikda fuqarolar poyezdlar harakatlanishini onlayn kuzatish mumkinligi haqida xabar berilgandi.
Maftuna Rejabboyeva