Тошкентда МДҲ ва Грузия давлатларининг кинематография раҳбарлари учрашуви бўлиб ўтади

 

21-23 декабрь кунлари тошкентда МДҲ давлатлари ва Грузия киностудиялари директорларининг кинематография соҳасидаги ҳамкорлик бўйича кенгаши ўтказилади.

 

Кенгашнинг асосий мақсади ҳаракатларни бирлаштириб, ҳамкорликни кенгайтириш ва янги механизмларини амалиётга татбиқ этишдан иборат.

 

Мазкур форумга Арманистон, Беларус, Грузия, Озарбайжон, Молдова, Тожикистон, Туркманистон, россия, Қирғизистон, Қозоғистон ва Ўзбекистон давлатлари киностудиялари раҳбарлари таклиф этилган. 

 

Ўзбекистон кинематография агентлиги бош директори  Фирдавс Абдухолиқов ушбу кенгаш 30 йил давомида тарқоқлашган МДҲ мамлакатлари киностудиясиларини бирлаштириш мақсад қилинганини билдирди:

 

“30 йил давомида ушбу давлатлар киноси ўртасидаги ҳамкорлик сусайиб, тарқоқлашиб қолганди. Минскда бўлиб ўтган фестивалда ўзбек делегацияси МДҲ мамлакатлари киностудияларини бирлаштирадиган механизм ишлаб чиқиш ташаббуси билан чиққан эди. Бундай бирлик бизга ижодий ва техник кўмак беради, тажриба алмашинуви жадаллашади, ҳамкорликда фильмлар ишлаб чиқарилади, имкониятларимизни кенгайтиради. Фақат зарурат туғилганидагина йиғилмасдан давомий механизмни ишлаб чиқишимиз зарур. Кенгашнинг мақоми ва шакли эса айнан Тошкентдаги йиғинда асосий муҳокама мавзуси бўлади”.

 

 Учрашув давомида студиялар  вакилларининг B2B форматидаги учрашувлари, давра суҳбатлари ўтказилади, қўшма лойиҳалар, киностудиялар ва киноконцернлар фаолиятининг самарали моделлари муҳокама қилинади.

 

Бундан ташқари, ҳамкорлик бўйича ягона йўл харитасининг лойиҳаси ишлаб чиқилади. Директорлар  кенгаши таркибига янги иштирокчилар қабул қилиниши ҳам кўзда тутилган.

 

Кенгашда иштирокчилар ўз киностудияларининг режаларини тақдим этишади ва фаолият моделларини билан таништиради. Шунингдек, уюшманинг расмий мақоми муҳокамаси ва танлови бўлиб ўтади.

 

Эслатиб ўтамиз, аввалроқ Tошкентда Бутунроссия кинематография институти филиали очилиши ҳамда "Олтин Ҳумо" миллий кинотақдимоти қачон ўтказилиши маълум бўлгани ҳақида хабар берилганди.

 

Чўлпоной Аҳмедова