Санъаткор Халимаxоннинг синглиси ИИБ ходимлари томонидан олиб кетилганига расмий изоҳ берилди
Маълум қилинишича, Ҳанифа Ибрагимова қидирувда бўлган ва у яширинган манзилида қўлга олинган.
Ижтимоий тармоқда санъаткор Халимахон Ибрагимованинг синглиси 21 июнь куни 15 нафар ИИБ ходимлари томонидан ҳеч қандай асоссиз равишда олиб кетилгани ҳақида видеохабар тарқалди. Ҳолат юзасидан Тошкент вилояти Ички ишлар бошқармаси ахборот хизмати раҳбари Бобур Тўлаганов расмий изоҳ берди.
Маълум қилинишича, Жиноят ишлар бўйича Нурафшон шаҳар суди фуқаро 1982-йилда туғилган Ҳ. И. Ўзбекистон Республикаси Жиноят Кодексининг 168-моддаси (Фирибгарлик) 4-қисмида назарда тутилган жиноятни содир этганликда айбланаётганлиги, жиноятининг ижтимоий хавфлилик даражаси ва ҳозирги кунда дастлабки терговдан бўйин товлаб юрганлиги ҳамда унга нисбатан қидирув эълон қилинганлик ҳолатларни инобатга олиб, фуқаро Ҳ. I.ga нисбатдан сиртдан қамоққа олиш тарзидаги эҳтиёт чорасини қўллаш бўйича ажрим қилган ва унинг ижросини таъминлаш Ички ишлар органларига юклатилган.
Мазкур ажримга асосан, Тошкент тумани ИИБ ходимлари томонидан фуқаро Ҳ.И.нинг (қидирувда бўлган) яширинган манзили аниқланиб, ушланган ва эҳтиёт чораси сифатида “қамоқ” қўлланилган. Ҳозирда ҳолат юзасидан дастлабки тергов ҳаракатлари олиб борилмоқда.
“Шу ўринда мурожаат муаллифини ва айрим ОАВ вакилларини мазкур ҳолат юзасидан тергов ҳаракатлари олиб борилаётганлигини инобатга олиб, жараёнга мақола, материаллар ёки бошқалар орқали таъсир ўтказмасликка ҳамда ахборотга бир томонлама ёндашмасликда чақирамиз”, — дейилади хабарда.
