Финляндия 30 сентябрдан россиялик сайёҳлар учун ёпилади
Руслар Финляндия визаси билан Евроиттифоққа ҳам кира олмайди.
Финляндия 30 сентябрь, жума кунидан бошлаб Россиядан келган сайёҳлар учун чегараларини ёпади. Аксарият туристик визалар бекор қилинади. Бу ҳақда Финляндия ташқи ишлар вазирлиги раҳбари Пекка Ҳаависто маълум қилди.
“Бундай ҳолатда саёҳатчи бошқа давлат чегараси орқали Финляндия томонидан берилган виза билан Европа Иттифоқига кира олмайди”, — деди ТИВ раҳбари.
Бироқ визаларни ўқиш, даволаниш ва яқин қариндошларникига бориш учун олиш мумкин. Виза режими дипломатик ходимлар, шунингдек, уларнинг яқинлари ва “мухолифат вакиллари” учун ҳам давом этади.
Финляндия ташқи ишлар вазирлиги ҳар бир россияликнинг кириши ҳақидаги қарорлар алоҳида кўриб чиқилишини қўшимча қилган.
