Иттифоқчилик, савдо, транспорт: Қосим-Жўмарт Тўқаевнинг Ўзбекистонга давлат ташрифи якунлари муҳокама қилинди
27 декабрь куни Марказий Осиё халқаро институтида бўлиб ўтган “Ўзбекистон ва Қозоғистон. Стратегик шериклик ва иттифоқчиликни ривожлантириш истиқболлари” мавзусида халқаро конференция ўтказилди.
Ўзбекистон ташқи сиёсатида Марказий Осиё устувор йўналиш сифатида белгиланган. Қозоғистон билан ҳамкорлик эса Республиканинг минтақа дипломатиясида катта ўрин эгаллайди.
Сўнгги йилларда Тошкент ва Остона ўртасидаги муносабатлар изчил ривожланиб бормоқда. Ўтган ҳафтада Қосим-Жўмарт Тоқаевнинг мамлакатимизга давлат ташрифи буни яна бир марта исботлади.
27 декабрь куни Марказий Осиё халқаро институтида бўлиб ўтган “Ўзбекистон ва Қозоғистон. Стратегик шериклик ва иттифоқчиликни ривожлантириш истиқболлари” мавзусидаги халқаро конференцияда икки давлат муносабатлари истиқболлари, ўтган ҳафтадаги ташриф якунлари ва бошқа масалалар муҳокама қилинди.
Тадбирда сўзга чиққан Президент ҳузуридаги Стратегик ва минтақавий тадқиқотлар институти директори Элдор Арипов икки давлат муносабатлари иттифоқчилик даражасига кўтарилганига эътибор қаратди. Шуни алоҳида қайд этиш лозимки, айнан Ўзбекистон ва Қозоғистон Марказий Осиё давлатлари ичида илк бор “Иттифоқчилик муносабатларини ўрнатиш тўғрисида шартнома” имзолади.
Арипов икки давлатнинг иқтисодий алоқалари ҳам тобора фаоллашиб бораётганини таъкидлади. Ўзбекистоннинг минтақа давлатлари билан ўзаро савдосининг 60 фоизи Қозоғистон ҳиссасига тўғри келади. 2017 йилдан буён ўзаро савдо 2 баробарга кўпайди. Бизнес доиралар ўртасидаги ҳамкорлик фаоллашгани ҳам қайд этилди.
Бундан ташқари, Элдор Арипов минтақанинг географик жиҳатдан ёпиқ эканини, бу транспорт коридорларини ривожлантиришни тақозо этаётганини қайд этди. Бу борада Транскаспий халқаро транспорт йўлаги алоҳида ўрин тутади.
Ҳамкорликнинг яна бир муҳим йўналиши энергетика ҳисобланади. сўзга чиққан аксарият спикерлар буни тасдиқлади. Хусусан, Қозоғистон Республикасининг Ўзбекистондаги фавқулодда ва мухтор элчиси Бейбут Атамкулов ўз чиқишида ушбу йўналишга эътибор қаратди. Унинг сўзларига кўра, Каспий денгизи орқали Европага экспорт қилинаётган энергетик ресурслар босқичма-босқич Ўзбекистонга йўналтирилади. Дунёда кузатилаётган энергетик инқироз ва углеводородлар тақчиллиги фонида бу ўта муҳим аҳамиятга эга.
Шунингдек, конференцияда икки давлат ўртасида маданий, илм-фан, ижтимоий, бундан ташқари, экспертлар жамияти ўртасидаги алоқаларни янада ривожлантириш зарурлиги қайд этилди.
