Янги ташқи ишлар вазири Россия элчиси билан учрашди
Ўзбекистон ТИВ раҳбари Туркия ва Озарбайжон элчилари билан ҳам учрашув ўтказди.
Кеча, 3 январь куни Ўзбекистон ташқи ишлар вазири в.б. Бахтиёр Саидов Россиянинг мамлакатдаги фавқулодда ва мухтор элчиси Олег Мальгиновни қабул қилди. Бу ҳақда вазирлик матбуот хизмати хабар берди.
Учрашувда сиёсий, дипломатик, савдо-иқтисодий, маданий-гуманитар ва бошқа соҳалардаги Ўзбекистон-Россия стратегик шериклик муносабатларининг долзарб масалалари юзасидан фикр алмашилди.
Иқтисодий дипломатияни жадаллаштириш, жумладан, товар айирбошлаш ҳажмини ошириш, инвестицияларни жалб этиш ва қўшма лойиҳаларни амалга оширишга алоҳида эътибор қаратилди.
Икки ва кўп томонлама шаклда бўлиб ўтадиган тадбирлар жадвали ва уларнинг кун тартиби муҳокама қилинди.
Ўзбекистон ва Россиянинг халқаро ва минтақавий институтлар доирасидаги мулоқотни давом эттиришга тайёрлиги қайд этилди.
Бундан ташқари, Бахтиёр Саидов Туркия ва Озарбайжоннинг Ўзбекистондаги элчилари Олган Бекар ва Гусейн Гулиев билан ҳам учрашди.
