Бахтиёр Саидов БМТ Бош котибининг биринчи ўринбосари билан Афғонистон масаласини муҳокама қилди

 

13 январь куни Ташқи ишлар вазири в.б. Бахтиёр Саидов мамлакатимизга ташриф буюрган Бирлашган Миллатлар Ташкилоти Бош котибининг биринчи ўринбосари Амина Муҳаммад билан учрашди.

 

Учрашувда Ўзбекистон билан БМТ ва унинг ихтисослашган институтлари ўртасидаги ўзаро ҳамкорликнинг долзарб масалалари юзасидан фикр алмашилди.

 

А.Муҳаммад кейинги йилларда Ўзбекистон билан БМТ ўртасидаги мулоқот сезиларли даражада кенгайиб, сифат жиҳатидан янги босқичга кўтарилганини таъкидлади.

 

2023 йилга мўлжалланган қўшма тадбирлар жадвали ва ташкилий жиҳатлари, жумладан, Умумий хавфсизлик ва фаровонлик йўлида Самарқанд бирдамлик форуми, Жаҳон туризм ташкилоти Бош Ассамблеясининг 25-сессияси ва бошқа анжуманларни о ътказиш масалалари кўриб чиқилди.

 

Мулоқот чоғида Афғонистондаги жорий вазиятга алоҳида эътибор қаратилди. БМТ вакилларига Ўзбекистон Президенти Шавкат Мирзиёевнинг Афғонистон ҳукумати билан томонларнинг мажбуриятларини босқичма-босқич бажариш алгоритмини тайёрлаш ва келишиш учун юқори даражадаги халқаро музокаралар гуруҳини шакллантириш ташаббусининг долзарблиги ҳақида маълумот берилди.

 

Афғонистон муаммосини ҳал этиш, афғон халқига, хусусан, Термиздаги халқаро логистика хаби имкониятларидан кенгроқ фойдаланиш орқали инсонпарварлик ёрдами кўрсатиш бўйича биргаликдаги ишларни давом эттириш бўйича келишувга эришилди.

 

Мулоқотда томонларни қизиқтирган бошқа масалалар ҳам муҳокама қилинди.