Кўп квартирали уйлар давлат боғчаларига айланиши мумкин
Бу ҳақда жорий йилги Давлат дастури лойиҳасида маълум қилинган.
2023 йил 1 апрелдан бошлаб, Ўзбекистонда давлат боғчалари кўп қаватли уйларда ташкил этилиши мумкин. Бу ҳақда жорий йилги Давлат дастури лойиҳасида маълум қилинган.
Мазкур лойиҳага асосан, мактабгача таълимдаги қамров даражасини ҳозирги 67 фоиздан камида 80 фоизга етказиш режалаштирилган.
Масалан, битта 150 ўринли давлат боғчасини яратиш учун ўртача 6 млрд сўм маблағ талаб этилади. Бундан ташқари, янги боғчани қуриш учун ер масаласи оғирлигича қолмоқда. Шу билан бирга, битта 3 хонали квартирада 25 нафар бола учун боғча ташкил этиш мумкин. 150 нафар бола учун 6 та квартирани харид қилиш ва жиҳозлашга ўртача 4 млрд сўм талаб этилади.
Бундан ташқари, давлат-хусусий шериклик лойиҳаси доирасида ижарага берилган ер участкасида нодавлат МТТ биносини қурган хусусий шерикка ушбу бинони мазкур лойиҳа учун банк кредитлари бўйича гаровга қўйишга оид чекловлар бекор қилинади.
1 600 та оилавий МТТларини ташкил этиш ҳисобига 40 мингдан ортиқ болалар ўрни яратилади. Бунинг учун бюджетдан 185 млрд сўм жалб этилади.
Натижада, мактабгача таълим билан қамровни оширишда хизмат қилаётган ва зарур молиявий ресурсларга муҳтож бўлган 594 та тадбиркорга қўшимча имконият яратилади.
