Россия “Толибон” билан энергетика соҳасида ҳамкорлик қилмоқчи
Афғонистон РФ, Покистон ва Эрон билан 1 миллиард долларлик инвестицион лойиҳаларни амалга оширмоқчи.
“Толибон” ва Россия 1 миллиард долларлик савдо иттифоқи тузади. Унга Эрон ва Покистон ҳам қўшилиши кутилмоқда. Бу ҳақда “База” Телеграм-канали маълум қилди.
Қайд этилишича, толиблар компаниялар консорциумини тузган. Улар инвестицион режа ишлаб чиқади ва энергетика, инфратузилма ҳамда ресурсларни қазиб олиш билан шуғулланади. Россиялик энергетик компания вакиллари Афғонистон саноат ва савдо вазири Нуриддин Азизий билан учрашган. Улар ўз лойиҳаси тақдимотини ўтказгани айтилмоқда.
Россия томони ҳам инвестор, ҳам пудратчи сифатида турли лойиҳаларда иштирок этиши кўзда тутилган. Масалан, Татаристон мутахассислари мамлакатда кўмир электростанциялари ва кўмирдан нефть маҳсулотларини ишлаб чиқариш заводини қуради. Афғонистон истеъмол қиладиган электрининг 30 фоизинигина ишлаб чиқаради. Нефть маҳсулотлари тўлиқ импорт қилинади. Шу билан бирга бу ерда катта миқдорда кўмир қазиб олинади.
“Толибон” улкан режалар тузаётгани таъкидланган. Масалан, ҳукумат Саланг довони орқали мамлакатнинг шимолий ва жанубий вилоятларини боғловчи яна бир туннель қуришни режалаштирган. Бундан ташқари, улар Кобул ва Ҳирот ўртасидаги асосий автомобиль йўлини тиклаш ниятида. Бир вақтнинг ўзида хорижий инвесторларни янада кўпроқ жалб қилиш учун алоҳида иқтисодий зоналар яратиш мақсад қилингани айтилмоқда.
