АҚШ глобал қарама-қаршиликка тайёрми?

 

АҚШ Россия ва Хитой билан қарама-қаршиликка тайёр эмас. Бу ҳақда The Wall Street Journal ёзмоқда.

 

Газетанинг қайд этишича, бугунги кунда Қўшма Штатлар етарли даражада ўқ-дори ва қурол ишлаб чиқармаяпти. Бу самарали тийиб туриш учун ўта муҳим омил ҳисобланади. Буюк давлатларнинг янги қарама-қаршилиги даври бошлангани ҳақида кўп гапирилаётган бўлса-да, қатор омиллар Вашингтоннинг тез муносабат билдиришига йўл қўймаяпти. Бу омиллар қаторига АҚШдаги ички зиддиятлар, Хитой таҳдидига бўлган турлича қарашлар ва жорий муаммоларга кўп эътибор қаратиш кабилар киради.

 

Бундан ташқари, Америка охирги ўн йилликда Яқин Шарқда исёнчи ва террорчи гуруҳларга қарши кураш олиб борди. Шу йиллар давомида сувости кемалари ва ракеталар ишлаб чиқариш қисқарган. Штаб машғулотларида аниқланишича, Тайвань можаросида АҚШнинг узоқ масофага учадиган ракеталари захираси бир ҳафтада тугайди. Қўшма Штатлар товуш тезлигида учадиган қуролларни ишлаб чиқаришда ҳам Москва ва Пекиндан орқада. Шунингдек, ҳарбий хизматнинг жозибадорлиги пасайган. Қуролли кучларда йилдан-йилга кўнгиллилар етишмаяпти.

 

Экспертларнинг тахминига кўра, халқаро вазият кескинлашган тақдирда АҚШ икки фронтда — Россия ва Хитойга қарши ҳаракатларни олиб бориши керак. Ҳарбий ҳаракатларнинг эҳтимолий нуқталаридан бири сифатида Арктика минтақаси кўрсатилмоқда. Бу ерда Вашингтон Москвадан ортда қолаётгани қайд этилган.

 

The Wall Street Journal 2030 йилга келибгина АҚШ Россия ва Хитойни технологиялар бўйича ортда қолдиришини таъкидлаган. Шу билан бирга ХХР билан Тайвань туфайли тўқнашув бундан олдин содир бўлиши мумкинлиги тахмин қилинган.