Украина катта ҳужумга тайёрланмоқда
Генерал Залужний 60 кишилик 3 та армия корпусини тузишни ва йирик қарши ҳужумга ўтишни режалаштирмоқда.
Украина катта ҳужумга тайёргарлик кўрмоқда. Сўнгги 3 ойда Пентагон уруш бошидан буён кўрсатган ҳарбий ёрдамининг 40 фоизи мамлакатга етиб келди.
Кўмакнинг кескин ўсиши 2023 йил январида кузатилди. Украина қуролли кучлари қўмондони Валерий Залужнийга кўра, етказиб берилган қурол ва техника 6 бригададан иборат 3 та корпусни шакллантиришга етади. Жами 60 минг кишилик бўлинмалар ташкил этиш мўлжалланмоқда.
“Барчанинг эътибори шарқдаги Бахмут шаҳрига қаратилган бир вақтда тез орада эътибор марказига кутилаётган қарши ҳужум тушади. У апрелда бошланиши мумкин”, – дейилади The Economist материалида.
ОАВ бурилиш нуқтаси сифатида 20 январни кўрсатган. Шу куни Украина мудофааси бўйича мулоқот гуруҳининг 8-йиғилишида Киевга март охиригача қурол етказиб беришни кўпайтиришга келишиб олинганди.
Январь ойида Бахмутга ҳужум кучайтирилди. Россия қўмондонлиги бу орқали Украина захираларини шу ерга жалб қилишга ҳаракат қилган. Лекин генерал Залужний қопқонга тушмади ва резерв қисмларни тайёргарликдан ўтиш учун Ғарбга жўнатди.
Шу билан бирга, баҳорги ҳужум натижалари қандай бўлиши номаълум — украин армиясининг катта қисмини ҳамон тажрибаси кам аскарлар ташкил этади. Бундан ташқари, ўқ-дори етишмовчилиги бор. Аммо нашрнинг қайд этишича, Россия армияси ҳам “аянчи аҳволда”. Агар руслар фронтлардан бирида ҳужум бошлайдиган бўлса, резервлар чўзилиб кетади. Бу мудофаа чизиғида бўшлиқлар пайдо бўлишига олиб келади. Украиналиклар эса бу вазиятдан усталик билан фойдаланиши мумкин.
