ISW: Рамзан Қодиров Путиннинг олдида мавқеини йўқотишдан хавотирда
Экспертлар россия президенти ва Чеченистон раҳбарининг кечаги учрашувини таҳлил қилди.
Американинг урушни ўрганиш институти (ISW)нинг кунлик ҳисоботида РФ президенти ва Чеченистон раҳбарининг кечаги учрашуви таҳлил қилинди.
Ҳарбий экспертларнинг фикрича, Рамзан Қодиров мулоқотдан Владимир Путинга чечен ҳарбийларининг Украинадаги ҳаракатларини мақтаниш учун фойдаланган. У ҳарбийлар РФ президенти буйруғини бажараётганини ва “охиргача ҳаракат қилиши”ни айтган. Бунга жавобан Путин чечен ҳарбийларининг ролини эътироф этган ва суҳбатдошига миннатдорлик билдирган.
Шу билан бирга таҳлилчилар Чеченистон раҳбари учрашувда асабийлашганини қайд этишган. Бу унинг катта босим остида ўтиргани натижаси бўлиши мумкин.
ISW ҳисоботида айтилишича, чечен ҳарбийлари Украинада сезиларли муваффақиятга эришмаяпти. Уларнинг роли минимал даражада. Чеченистон бўлинмалари Луганск вилоятининг Белогоровка районида ҳужум операциясини амалга оширмоқда. Бошқа пайтларда эса босиб олинган ҳудудларда тартибни сақлаш ишларида иштирок этяпти.
Экспертлар хулосасига кўра, Қодиров Путин олдидаги мавқеини йўқотишдан чўчимоқда. Чунки у йирик ҳарбий муваффақиятларини кўрсата олмаяпти. Ушбу учрашув орқали Чеченистон раҳбари ўз позициясини мустаҳкамламоқчи бўлган.
Ўз навбатида Путин Қодировга босим ўтказиш ва чечен бўлинмаларини ролини оширишга мажбурлашга ҳаракат қилган.
