Асад Россия аннексия қилган ҳудудларни тан олишини билдирди
Сурия президенти Украинадан тортиб олинган ҳудудларни “РФнинг тарихий ерлари” деб атаган.
Сурия Россия Украинанинг эгаллаб олган ҳудудларини тан олади. Бу ҳақда Башар Асад маълум қилди.
“Албатта. Мен буни Россия ҳудудлари дейман ва ҳатто уруш бўлмаган тақдирда ҳам бу Россиянинг тарихий ҳудудлари деб ҳисоблайман”, – деган у “РИА Новости” агентлигига.
Шу билан бирга Асад айнан қайси ҳудудлар ҳақида гапираётганига аниқлик киритмаган. Аммо у Дамашқ “ДХР” ва “ЛХР” мустақиллигини тан олганини билдирган.
Кузда РФ Украинанинг Донбасс, Луганск, Запорожье ва Херсон вилоятларининг бир қисмини аннексия қилганди.
Сурия президенти 15 март кунлари Владимир Путин билан музокара ўтказди. Бу унинг Украина можароси бошлангандан буён Россияга илк ташрифи бўлди.
