Politico: Хитой Россияга минглаб милтиқ ва бронежилет етказиб берган

 

Хитой компаниялари Россияга энг камида мингта автомат, шунингдек, турли амуниция ва қурилмалар етказиб берган. Politico нашри маълумотларига кўра, ушбу қурилмалардан қурол сифатида фойдаланиш мумкин.

 

Import Genius божхона маълумотлари агрегатори таҳлилларида кўрсатилишича, бу корхоналарнинг энг камида биттаси Хитой давлати билан боғлиқ. Гап China North Industries Group Corporation Limited ҳақида кетмоқда. У 2022 йилда РФнинг “Техкрим” компаниясига CQ-A  штурм милтиқларини етказиб берган. Ҳужжатларда у “ов милтиғи” сифатида кўрсатилган.

 

Мақолада ушбу милтиқлар Украинада ишлатилгани ҳақида аниқ маълумотлар йўқлиги таъкидланган. Аммо бу ерда Da-Jiang Innovations Science & Technology Co компаниясига тегишли DJI дронлари топилган. Бу компанияга қарши АҚШ санкциялар жорий этган.

 

Хитойдан Россияга кираётган икки мақсадли товарлар

РФ қўлга киритиши мумкин бўлган қурилмалар орасида Хитойда ишлаб чиқарилган дрон деталларини кўрсатиш мумкин. у ўз ичига аккумлятор ва камераларни ҳам олади. Товарлар Россияга БАА орқали экспорт қилинган. Бундан ташқари, хитойликлар 12 тонна бронежилетларни Туркия орқали етказиб берган бўлиши мумкин.

 

Мавжуд маълумотларга кўра, Пекин Москвага катта миқдорда қурол сотмаяпти. Аммо журналистларнинг аниқлашича, икки мақсадли товарлар — ҳарбий мақсадларда фойдаланиш мумкин бўлган фуқаролик технологияларини етказиб беряпти.

 

Бундан олдин АҚШ бир неча бор Хитойни РФга қурол етказиб бериш оқибатларидан огоҳлантирганди.