АҚШ Си Цзиньпиннинг Москвага ташрифидан нималар кутмоқда?
Бу бўйича Энтони Блинкен маълумот берди.
АҚШ Хитой етакчиси Си Цзиньпиннинг Москвага ташрифи чоғида Украинада ўт очишни тўхтатишга ёрдам беришини кутмоқда. Бу ҳақда Қўшма Штатлар Давлат котиби Энтони Блинкен маълум қилди.
Бугун, 20 март куни Хитой раиси давлат ташрифи билан Москвага борган.
“Биз Хитойдан ушбу ташрифдан фойдаланиб, Украинада ўт очишни тўхтатиш чақириғини такрорлашини кутамиз”, — деди Блинкен журналистларга.
Унинг таъкидлашича, ҳар қандай тинч йўл билан келишув Украина суверенитетини тасдиқлаши керак.
Февраль ойида Хитой Ташқи ишлар вазирлигининг 12 банддан иборат баёноти Украина инқирозини сиёсий йўл билан ҳал қилиш бўйича позицияси билан эълон қилинганди. Асосий фикрлар орасида барча мамлакатларнинг суверенитети ва ҳудудий яхлитлигини ҳурмат қилиш зарурати, Москва ва Киев ўртасида тўғридан-тўғри мулоқотни қайта тиклаш, янада кескинлашувнинг олдини олишга чақириш бор.
