Зилзиладан азият чеккан Туркия ва Сурия учун 7 млрд евро йиғилди
Брюсселда ушбу масалага бағишланган донорлар конференцияси бўлиб ўтди.
Брюсселда бўлиб ўтган халқаро донорлар конференциясида Туркия ва Суриядаги зилзила оқибатларини бартараф этиш учун 7 миллиард евро йиғилди. Еврокомиссия Раиси Урсула фон дер Ляйеннинг сўзларига кўра, бу барча тахминлардан “ошиб кетди”.
“Халқаро ҳамжамият Туркия ва Сурияни қайта тиклашни қатъий қўллаб-қувватлаётганини кўришдан хурсандман”, – деган у Швеция бош вазири Ульф Кристерссон билан матбуот анжуманида.
Бундан олдин фон дер Ляйен Биргина ЕИ Туркия тикланиши учун 1 миллиард евро ажратишини эълон қилганди. Қўшимча 108 миллион евро эса Сурияга гуманитар ёрдам сифатида йўналтирилади.
“Миллионлаб одамлар уйсиз қолди ва давом этаётган қиш мавсумида чодирларда яшамоқда. Тикланишни тезлаштириш учун барча ресурсларни сафарбар қилишимиз керак. Уйлар, мактаб ва шифохоналар сейсмик хавфсизликнинг энг юқори талабларига жавоб берадиган қилиб қайта қурилиши керак. Сув таъминоти, санитар ва бошқа муҳим инфратузилма таъмирланиши зарур. Давлат идоралари ва корхоналари фаолияти тикланиши учун капиталга муҳтож”, – деган ЕК раиси.
Бундан олдин Туркия президенти Ражаб Тоййиб Эрдоған мамлакат зилзила оқибатида 104 миллиард доллар зарар кўрганини айтганди. Ҳозирга қадар Туркия ва Сурияда зилзила қурбонлари сони 50 мингдан ошиб кетди.
