Россиялик губернаторнинг уй қамоғидаги ўғли қочиб кетди

 

Россиянинг Красноярск ўлкаси губернатори Александр Усснинг Италияда қамоққа олинган ўғли Артём Усс Миландаги уй қамоғидан қочиб кетди. Икки кун олдин Милан аппеляцион суди уни АҚШга экстрадиция қилиш бўйича ҳукм чиқарганди. 

 

Италия ОАВга кўра, 22 март куни 40 ёшли Усс электрон браслетни синдирган ва квартирасини тарк этган. Ҳозирда уни полиция қидирмоқда. Қочоқнинг италиялик адвокати Винисио Нардо хабарларга изоҳ беришдан бош тортган.

 

Артём Усс 2022 йил октябрида АҚШ сўрови билан Милан аэропортида қўлга олинганди. Қўшма Штатлар уни Америка ҳарбий технологияларининг ноқонуний савдоси ва пул ювишда айбламоқда. Усс иши доирасида Германияда россиялик тадбиркор Юрий Орехов ва яна 3 нафар шахс қўлга олинган.

 

Италия суди АҚШнинг 2 даъволарини тўғри деб топди: губернаторнинг ўғли Венесуэла нефтини контрабанда қилиш ва банк фирибгарлигида гумонланган. Россия ҳам Уссни экстрадиция қилишни сўраган. Москва суди уни сиртдан қамоққа олиш бўйича ҳукм чиқарган. Тадбиркор ватанида ҳам пул ювишда айбланган

 

Артём Усснинг ўзи италияликлардан ватанига қайтаришни сўраган. У АҚШ айбловларини сиёсий сабаблар билан боғлаб, айбини тан олмаган.