Зеленский: АҚШ ёрдами тўхтаса, Украина мағлуб бўлади
Украина президенти Бахмут учун жангнинг аҳамиятини тушунтирди.
Агар Украина Бахмутда ғалаба қозонмаса, Россия мамлакатдан ўзи учун қулай компромиссларни талаб қилиши мумкин. Бу ҳақда Владимир Зеленский Associated Press нашрига берган интервьюсида маълум қилди.
“Бахмут қуласа,Путин бу ғалабани Ғарбга, ўз жамиятига, Хитой, Эронга сотади. Шундан кейин Киевга босим бошланади. Бизнинг жамият чарчоқни ҳис қилади. Шундан кейин у мени келишувга ундайди”, – деган Украина раҳбари.
Зеленскийнинг фикрича, агар АҚШ украиналикларга ҳарбий ёрдамни тўхтатиб қўйса, Киев ғалаба қозона олмайди. У Вашингтондаги сиёсий ўзгаришлар урушга таъсир этишидан хавотирда.
Бундан ташқари, сиёсатчи ХХР раҳбари Си Цзиньпинни Украинага таклиф қилган. У Хитой етакчиси билан уруш даврида умуман мулоқот қилмаганини эслатган.
