Самарқанддаги метан «заправка»да юк машинаси ёниб кетди
У 20 тонна ёнилғи ташишга мўлжалланган бўлган.
Бугун, 10 апрель куни Самарқанд вилояти Ургут туманидаги газ тарқатиш шохобчаси ҳудудида ёнғин содир бўлди. Ҳолат юзасидан Фавқулодда вазиятлар вазирлиги маълумот берди.
Қайд этилишича, соат 16:48 да Самарқанд вилояти ФВБга Ургут туманида жойлашган «Қорабулок» МФЙда газ тарқатиш шохобчаси ҳудудида ёнғин содир бўлгани ҳақида хабар келиб тушган.
Маълум бўлишича, ёнилғи сиғими 20 тонна бўлган юк машинаси ёниб кетган. Зудлик билан воқеа жойига ФВВ вилоят бошқармасининг 4 та ёнғин-қутқарув гуруҳи етиб борган ва ёнғин соат 17:35 да ўчирилган.
Ёнғин ўчирилгандан сўнг вазиятни ўрганиш давомида ушбу ҳодиса натижасида бир киши жароҳатлангани маълум бўлди. У энг яқин тиббий муассасага ётқизилган.
