Тошкентда фуқаро аёл шифокор юбормагани учун тез тиббий ёрдам ходимини ҳақорат қилди
Ҳозирда унга нисбатан маъмурий иш очилган.
Ижтимоий тармоқларда Тошкент шаҳрида фуқаро онаси учун аёл шифокорларни юборишни сўраб тез тиббий ёрдам фельдшерига таҳдид қилгани ҳақида хабарлар тарқалди. Ҳолат юзасидан шаҳар ИИББ ахборот хизмати маълумот берди.
Қайд этилишича, 1 апрель куни 1990 йилда туғилган N.X. онасининг саломатлиги ёмонлашганлиги сабабли тез тиббий ёрдам хизматига қўнғироқ қилиб, хабарни қабул қилган диспетчер — 1998 йилда туғилган G.Z.dan фақат аёл тиббиёт ходимларини юборишини сўраган. Диспетчер тез тиббий ёрдам кўрсатиш бўйича ички қоидаларда бундай талаб белгиланмаганлигини маълум қилиб, шу вақтда бўш аёл шифокорлар бригадаси бўлмаганлиги сабабли биринчи тиббий ёрдам кўрсатиш учун энг яқин бригадани юборган. Фуқаро манзилга етиб борган бригадада эркак шифокорларни кўриб, уларни уйга киритмай норозилик билдирган ҳамда телефон орқали диспетчерни ҳақорат қилган.
Мазкур ҳолат юзасидан Юнусобод тумани ИИО ФМБ ходимлари томонидан фуқаро N.X.ga нисбатан Маъмурий жавобгарлик тўғрисидаги кодекснинг 41-моддаси (“Ҳақорат қилиш”) билан маъмурий баённома расмийлаштирилиб, тўпланган ҳужжатлар якуний қарор қабул қилиш учун судга юборилган.
