Фарғонада ЙПХ ходими Spark ойнасини синдирди
Маълум бўлишича, ҳайдовчи инспекторнинг қонуний талабига бўйсунмаган.
Ижтимоий тармоқда Фарғона вилоятининг Учкўприк туманида йўл патруль хизмати ходими Spark автомашинаси ойнасини синдиргании акс этган видео тарқалди. Ҳолат юзасидан вилоят ИИБ ахборот хизмати маълумот берди.
Ҳолат бугун, 14 апрель куни Учкўприк тумани Бегобод қишлоғи ҳудудидан ўтган 4Р-112 автомобил йўлида юз берган. ЙПХ инспектори А.А.га давлат рақам белгисиз, ён ойналари туси ўзгартирилган Spark русумли транспорт воситаси ҳаракатланиб бораётгани ҳақида хабар келиб тушган.
Шундан сўнг инспектор автомобилни тўхтатиш чораларини кўрган. Лекин ҳайдовчи Ж.Ж. ходимнинг тўхташ ва автомашинадан тушиш ҳақидаги қонуний талабларига бўйсунмаган. Ушбу вазиятда ходим Ички ишлар вазирлиги буйруқ талабларига асосан куч ишлатиб, автомобил ойнасини синдириб, ҳайдовчини тўхтатиб қолган.
“Ҳолат юзасидан ҳайдовчи Ж.Ж.га нисбатан Маъмурий жавобгарлик тўғрисидаги кодекснинг тегишли моддалари билан ҳужжатлар расмийлаштирилиб, автомобиль жарима майдонига жойлаштирилди”, — дейилади хабарда.
