Тошкентда физика олимпиадасининг финал босқичи бўлиб ўтди

 

Бугун, 15-апел куни “Янги Ўзбекистон” университетида “Буюк алломалар изидан” номли фан олимпиадаси ҳамда Математика халқаро илмий конференцияси бўлиб ўтди. Бу ҳақда университет матбуот хизмати хабар бермоқда.

 

Соврин жамғармаси 1 миллиард сўмлик “Буюк алломалар изидан” номли физика фани олимпиадасининг якуний финал босқичида барча умумтаълим мактаблари, академик лицейлар ҳамда касб-ҳунар техникумларининг битирувчи синф ўқувчиларидан сараланган 255 нафари иштирокчи қатнашган 

 

Унда ҳар бир иштирокчига 5 та саволдан иборат бўлган ёзма иш тақдим этилди. Ёзма ишлардан энг юқори кўрсаткични қайд этган 1 нафар талабгор мутлақ ғолиб ҳамда кейинги ўринлардаги энг юқори кўрсаткичларни қайд этган 10 нафар талабгор мутаносиб равишда совриндорлар деб топилди.

 

Мутлақ ғолибликни қўлга киритган талабгор 20 миллион сўм пул мукофоти, “Янги Ўзбекистон” университетида таҳсил олиш учун бир йиллик 100 фоизлик грант (38 миллион сўм) ҳамда бошқа сертификат ва медаллар билан тақдирланди. 10 нафар совриндорлар эса 2 миллиондан пул мукофоти, “Янги Ўзбекистон” университетида таҳсил олиш учун бир йиллик 100 фоизлик грант (38 миллион сўм) ҳамда бошқа сертификат ва медаллар билан тақдирланди.

 

Шунингдек, математика соҳасида олиб борилаётган илмий-тадқиқот ишлари самарадорлигини ошириш ҳамда бу соҳадаги олимлар фикр алмашиши учун махсус майдонча яратиш мақсадида “International Сonferenсe on Operator Algebras, Variyeties of Algebras and Related Topiсs” халқаро илмий математика конференцияси ўтказилди.

 

Конференцияга Ўзбекистоннинг ёрқин математик олими, В. И. Романовский номидаги Математика институти директори Ш. Аюпов ва дунё миқёсидаги машҳур математик олимлардан бири Франциянинг Страсбург университети Илғор математик тадқиқотлар институти профессори В. Дотсенко иштирок этди. Конференцияга хориждан ва республика ҳудудларидан 50 га яқин профессор-ўқитувчи ва тадқиқотчилар ташриф буюрди. Тадбир эртага ҳам давом этади.