"Аҳолидан фикрларни тўплаш бўйича Ўзбекистоннинг тажрибасини дунё мамлакатлари ўрганса бўлади"
Олий Мажлиси Қонунчилик палатасида «Конституциявий ислоҳотларнинг моҳияти ва аҳамияти: Янги Ўзбекистон – янгиланаётган Конституция» мавзусидаги халқаро конференция бўлиб ўтмоқда
Олий Мажлиси Қонунчилик палатасида «Конституциявий ислоҳотларнинг моҳияти ва аҳамияти: Янги Ўзбекистон – янгиланаётган Конституция» мавзусидаги халқаро конференция бўлиб ўтмоқда. Унда Олий Мажлис Қонунчилик палатаси депутатлари, Сенат аъзолари, халқаро экспертлар, олимлар ҳамда ОАВ вакиллари иштирок этяпти.
Акмал Саидов, Олий Мажлис Қонунчилик палатаси Спикерининг биринчи ўринбосари:
Янгиланаётган Конституция матни бир гуруҳ олим, мутахассислар томонидан эмас, балки халқнинг, кенг жамоатчиликнинг таклифи ва фикри асосида ишлаб чиқилди. Конституциявий ислоҳотларнинг дастлабки икки босқичда халқнинг фикри, таклифлари ўрганилди ва шу асосда Бош қомус лойиҳаси тайёрлангани Янги Ўзбекистонни қуриш ғояси атрофида бутун жамият жипслашгани, Бош Қомусимиз том маънода халқ Конституцияси бўлаётганидан далолат беради.
Одилжон ТОЖИЕВ, Олий Мажлис Қонунчилик палатаси Спикерининг ўринбосари:
Бош қомусимизга ўзгартиришлар киритиш жараёни ўзгача сиёсий муҳитда, яъни халқимизнинг сиёсий онги, фаоллиги, ҳуқуқий маданияти жамиятда кечаётган янгиланиш ва ўзгаришларга монанд равишда ўсиб бораётган, давлат ва жамият бошқарувида очиқлик тамойиллари таъминланаётган бир даврда ўтмоқда.
Конституциявий қонун лойиҳаси турли экспертизалардан, жумладан лингвистик, юридик, гендер-ҳуқуқий, коррупцияга қарши, жамоатчилик ҳамда инсон ҳуқуқлари бўйича нормаларга мувофиқлиги бўйича экспертизалардан ўтказилди. Конституциявий қонун лойиҳасини тубдан такомиллаштириш учун сарфланган вақт – мазкур ҳужжат лойиҳасини фуқаролар ва экспертлар ҳамжамияти билан батафсил муҳокама қилиш имконини берди.
Санжар Ҳамидуллаев, Олий Мажлис Қонунчилик палатаси депутати:
Барчамиз кўриб-билиб турибмиз. Бугунги кунда инсоният ўз тарихидаги ниҳоятда мураккаб даврни бошидан кечирмоқда. Ҳозирги вақтда дунёда турли кучлар ўртасида қарама-қаршилик ва зиддиятлар кучаймоқда, ресурслар учун шафқатсиз кураш кетмоқда. Ушбу глобал вазиятда Ўзбекистон миллий манфаатлардан келиб чиқиб очиқ, прагматик ва фаол ташқи сиёсатни изчил олиб бормоқда.
Же Ҳёк Шин, Корея университети Ижтимоий масъулият институти директори:
Юқори даражадаги халқаро конференцияда профессор сифатида иштирок этаётганимдан беҳад мамнунман. Ўзбекистон халқи учун муҳим ижтимоий-сиёсий жараён арафасида ўтказилаётган ушбу тадбирда қатнашиш мен учун шараф. Ўзбекистоннинг янги таҳрирдаги Конституцияси мамлакатнинг ижтимоий-сиёсий, иқтисодий тараққиётида аҳамияти катта бўлади. Парламент ваколатларини кенгайтиришга қаратилган нормалар мени жуда хурсанд қилди, янгиланаётган Конституция билан Ўзбекистон халқини табриклайман.
Роза Жайлобаева, Қирғиз Республикаси Адлия вазирлиги ҳузуридаги Норма ижодкорлиги ва қонун устуворлиги институти директори ўринбосари:
Конституциявий ислоҳотларни юқори даражада ташкиллаштириш, аҳолининг кенг қатламидан фикрларни тўплаш бўйича Ўзбекистоннинг тажрибасини дунё мамлакатлари ўрганса бўлади. Ўзбекистоннинг янги таҳрирдаги Конституциясида иқтисодий блок масалалари тўлиқ акс этган. Ҳаттоки монопол фаолиятни чекловчи тўғридан-тўғри норма борлиги эътиборга лойиқ. Янгиланаётган Бош қомусингизнинг давлат инвестициявий муҳитни ривожлантириш чораларини кўриши назарда тутилган 67-моддаси ҳам алоҳида диққатимни тортди. Ўзбекистондаги мазкур Конституциявий ислоҳот мамлакатнинг иқтисодий тараққиётини сифат жиҳатдан янги босқичга кўтаришига ишонаман.
Жеймс Уортон, Буюк Британия Парламенти Лордлар палатаси аъзоси:
Дунё тараққиёти ўзгарар экан, парламентлар, қонунлар ҳам ўзгариши керак. Янгиланаётган Конституцияда аҳоли турмуш фаровонлигини оширишга қаратилган қатор нормаларни олқишлайман. Қонун устуворлиги, саёҳат, уй-жойга эга бўлиш, инсонлар ҳаётини яхшилашга мўлжалланган бошқа нормалар Ўзбекистонда аҳоли турмуш даражасини сезиларли даражада оширишга хизмат қилади.
