Тошкентда аёл киши номидан аккаунт очиб, бошқаларни алдаб юрган эркак қўлга тушди
Ҳозирда унга нисбатан жиноят иши қўзғатилган.
Тошкент шаҳрида аёл киши номидан профиль очиб, бошқаларни алдаб юрган эркак қўлга тушди. Бу ҳақда ИИВ Киберхавфсизлик маркази хабар бермоқда.
Олмазор туманида яшовчи 33 ёшли эркак П.O. Telegram мессенжери орқали номаълум аккаунт эгаси унинг пулларини талон-торож қилганини маълум қилиб, ушбу шахсга нисбатан қонуний чора кўришликни сўраган.
Ўтказилган тезкор-қидирув тадбирларида ушбу жиноятни Учтепа туманида яшовчи, ўзини соҳибжамол аёл сифатида таништирган шахс — 29 ёшли эркак A.Ж. содир этгани маълум бўлган.
A.Ж. Telegram мессенжерида П.O. билан аёл сифатида танишиб, унга пул эвазига интим хизмат таклиф қилган ва олдиндан унинг 500.000 сўм пулини ўзининг банк картасига ўтказиб олган. Шундан сўнг унинг қўнғироқларига жавоб бермасдан, П.O.нинг телефон рақамини “қора рўйхат”га киритиб қўйган.
Жиноят содир этган A.Ж.гa нисбатан Жиноят кодексининг 168-моддаси 3-қисм «г» банди билан жиноят иши қўзғатилган. Қонунга мувофиқ, у содир этган жиноий ҳаракатлар учун 5 йилдан 8 йилгача озодликдан маҳрум қилиш жазоси тайинланиши мумкин.
