Истанбулга туташ, аммо ундан олисда бўлган: Принс ороллари
Принс — ороллар, соҳиллар, ўзига хос манзарали кўчалар, маҳаллий лаззатлар ва меъморчилик анъаналарига эга.
Истанбулнинг жануби, Мармара денгизида жойлашган Принс ороллари - ажойиб манзара ва гул ифорлари таралиб турувчи мўътадил иқлимга эга. Ороллар, соҳиллар, ўзига хос манзарали кўчалар, маҳаллий лаззатлар ва меъморчилик анъаналарига эга.
Истанбулнинг шарқий қисмида жойлашган Принс ороллари ҳам орол ҳаётининг осойишталигини, ҳамда Истанбул тафтини ҳис қилишни истаганлар учун идеал муҳитни тақдим этади. Баъзан дам олиш кунларида кундалик шовқин-сурондан узоққа қочиш нуқтаси бўлган Принс ороллари ҳар бир ташриф буюрувчилар учун қулайлик келтирадиган манзиллардан биридир. Яшил ва мовий рангни моҳирона уйғунлиги бўлган Мармара денгизининг бепоёнлиги, унинг ёқимли шабадаси, Туркиянинг энг машҳур ёзувчиларига мезбонлик қилган тарихий қасрлари билан Принс ороллари барчага бирдек ижобий таассурот қолдириши муқаррар.
Принс ороллари тўққизта гўзал оролдан иборат: Буюкада, Ҳейбелиада, Киналиада, Бургазада, Седеф ороли, Ясциада, Сивриада, Кашик ороли ва Тавшан ороли. Истанбулнинг Европа ва Осиё томонидан ҳар кунги ташиш хизматлари билан фақат Буюкада, Ҳейбелиада, Киналиада, Бургазада ва Седеф оролларига осонгина бориш мумкин. Принс оролларини энг жозибали қиладиган хусусият, бу унинг кўчалари транспорт учун ёпиқлигидир.
Истанбулга туташган, аммо ундан узоқдa
Миш-мишларга кўра, Принс ороллари Шарқий Рим империяси даврида князлар ва императорлар сургун қилинган жой бўлганлиги сабабли шундай номланган. Ороллар тарих давомида руҳонийлар учун эрмитаж ва монархлар учун ёзги дам олиш маскани бўлиб хизмат қилган. Оролларда машҳур турк муаллифлари ва дунёнинг таниқли сиёсий раҳбарлари ҳам истиқомат қилишган. У баҳор ва ёз давомида Истанбул аҳолиси учун бошпанага айланиб улгурган. Тарихий қасрлар ёзги уйларга айлантирилгач, Принс ороллари сайёҳларнинг ҳордиқ чиқаришлари, салқинлашлари, кўчаларда велосипед учишлари, узоқ сайрга чиқишлари ва балиқчилар билан мулоқот қилишлари мумкин бўлган имкониятлари билан севимли дам олиш масканига айланди.
Принс оролларида тўрт хил фасл бўлсада, баҳор ва ёз энг ёқимлисидир. Оролларнинг жонлантирувчи муҳити, айниқса, қуёш чиқа бошлаган баҳорда, гуллар, дарахтлар, тупроқ ва денгизнинг мусаффо иси билан ташриф буюрувчиларни ўзига жалб қилади.
Энг катта орол
Принс оролларининг энг каттаси Буюкада бўлиб, туркчадан “Катта орол” деб таржима қилинади. Ташриф буюрувчилар баҳор ва ёзда турли хушбўй гуллар билан қопланган орол кўчаларида сайр қилишни, велосипедда орол бўйлаб саёҳат қилишни ва оролнинг ўрмонзорларида сайр қилишни хуш кўрадилар. Меҳмонларни паром кемаси яқинидаги машҳур соат минораси кутиб олади.
Жозибали тарихий бинолар
Ҳейбелиада, Принс оролларидаги иккинчи йирик оролдир. Ҳейбелиадада ҳам Буюкада каби кўплаб тарихий иншоотлар жойлашган. Ая Ёрги монастири, Бет Яаков ибодатхонаси ва Ая Никола черкови қоя ёнида жойлашган бўлиб, оролнинг ўтмишидаги тарихий жойдан чиқиб кетишни истаганлар учун жуда мос келади. Руҳонийларни тайёрлаш учун очилган Семинария мактаби оролда кўриш керак бўлган жойлардан биридир. Бугунги кунда мактаб оролда муҳим фестиваллар ва тадбирларга мезбонлик қилади. Оролнинг табиатини ўрганиш учун Деғирменбурну Табиат Паркига велосипедда ёки пиёда ташриф буюришингиз мумкин.
Машҳур эртакчи Саит Фаиқ зиёратгоҳи
Бургазада қуруқлик бўйича Принс оролларидаги учинчи йирик оролдир. Бургазада бир нечта тарихий иншоотлар, серҳашам уйлар ва сиз баҳор давомида кашф қилишингиз мумкин бўлган ажойиб табиий гўзалликка эга. Бургазада ўзига хос соҳиллари туфайли ёзда истанбулликларнинг эътиборини тортади. Ая Ёрги монастири, Ая Яни черкови ва Саит Фаик музейи Бургазаданинг диққатга сазовор жойларидан бир нечтаси саналади. Саит Фаиқ музейи таниқли турк шоири ва ҳикоянависи Саит Фаик Абасянкнинг собиқ уйида жойлашган бўлиб, у бир муддат Бургазадада бўлган. Сиз оролнинг чап томонида жойлашган Калпазанкая бўйлаб сайр қилишингиз ва Бургаз оролининг табиий гўзаллигига гувоҳ бўлиш учун оролдаги ягона тепалик бўлган Байрак тепалигидан эсдалик суратлар олишингиз мумкин.
Қизил орол — Киналиада
Бу Истанбулга энг яқин орол бўлиб, у ҳам жисмоний ҳам руҳий ҳордиқ чиқариш учун ажойиб танловдир. Турли маданиятларга мансуб кўплаб одамлар бирга яшайдиган бу ёқимли орол, қўшни оролларга нисбатан кичикроқ майдонга эга. Бутун оролнинг у четидан бу четигача босиб ўтиш учун сизга ярим соат ҳам кифоя қилади. Христос монастири ва Сурп Крикор Лусаворич черкови Киналиададаги икки эски иншоотлардандир. Черков тош ўймакорлигининг ажойиб намуналари билан ажралиб туради.
