Тошкентда янги автобусларга ҳайдовчилар пул эвазига бириктирилаётгани айтилди

 

Ижтимоий тармоқларда Тошкент шаҳрига янги олиб келинган автобусларга ҳайдовчиларни бириктириш учун 150-200 АҚШ доллалари миқдорида пул талаб қилинаётгани ҳақида хабар тарқалди. Ҳолат юзасидан «Тошшаҳартрансхизмат» АЖ муносабат билдирди.

 

Маълум қилинишича, янги харид қилинган YUTONG ва KING LONG русумли йўловчи ташувчи автобусларни ҳайдовчиларга бириктириш бўйича махсус буйруқ қабул қилинган. Унга кўра, ҳайдовчиларни ишга қабул қилиш ҳамда уларни автобус ва электробусларга бириктириш бўйича низом тасдиқланган. Низом асосида Автобус саройи филиалларининг ҳар бирида Ички ишлар ходими, Ҳаракат хавфсизлиги бошқармаси ходими, бош муҳандис, таъмирлаш устахонаси бошлиғи ва тасарруф бўлими ходимларидан ташкил топган ишчи гуруҳ аъзолари томонидан ҳайдовчиларни янги автобус ва электробусларга бириктиришда очиқ суҳбат ўтказилиб, шаффофлик ва ҳалоллик принципларига таянган ҳолда суҳбат жараёнлари онлайн видео тасвирга олувчи мосламада тасвирга олиб борилмоқда.

 

Бунда ҳайдовчиларни бир нечта устувор тамойиллар асосида автобусларга бириктириш белгиланган. Ҳайдовчининг сўнгги уч йил мобайнида содир этган қоидабузарликлари ва йўл-транспорт ҳодисалари, муқаддам бошқарган транспорт воситаларининг таъмирлаш ишларида фаоллиги  ҳамда йўловчиларга нисбатан қўпол муносабатда бўлган ёки йўқлиги инобатга олинган ҳолда энг яхши ва юқори кўрсаткичларга эга бўлган ҳайдовчилар янги харид қилинаётган автобусларга бириктирилмоқда.