Олий Мажлис депутати Хитой элчисига жавоб қайтарди
“Юксалиш” умуммиллий ҳаракати раиси, Олий Мажлис депутати Бобур Бекмуродов сал аввалроқ халқаро низони келтириб чиқарган Хитой элчисининг чиқишига муносабат билдирди.
Аввалроқ, Хитойнинг Франциядаги элчиси Лу Шай 23 апрель куни бўлиб ўтган телемулоқот чоғида “постсовет давлатларининг суверенитетини “кучли ҳуқуқий асосга эга эмас” деб айтганди.
Ташқи ишлар вазирлигининг 3 кунлик сукутидан сўнг ушбу гапларга Олий Мажлис депутати муносабат билдирди.
«Ўзбекистон мустақиллиги дахлсиздир. Постсовет ҳудудидаги мамлакатларнинг мустақиллиги борасидаги ҳар қандай шубҳалар ва зиддиятли фикрларнинг Ўзбекистонга ҳеч қандай алоқаси йўқ», — дея ўз саҳифасида ёзди “Юксалиш” умуммиллий ҳаракати раиси, Олий Мажлис депутати Бобур Бекмуродов.
Маълумот ўрнида: Хитой ташқи ишлар вазирлиги элчисининг сўзларидан сўнг: «Хитой барча мамлакатларнинг суверенитети, мустақиллиги ва ҳудудий яхлитлигини ҳурмат қилади ҳамда Бирлашган Миллатлар Ташкилоти низомининг мақсад ва тамойилларини қўллаб-қувватлайди», дея баёнот билан чиққанди.
