“Қизил китобга” киритилган ҳайвонни овлашга рухсат берилган эди
Табиат ресурслари вазирлиги ходими жамоатчилик эътирозига сабаб бўлган вазиятга ойдинлик киритди.
Россиялик овчи Сергей Мазуркевич Сурхондарёда “Қизил китоб”га киритилган морхўр ва архар (тоғ эчкиси турига мансуб ёввойи ҳайвон)ни отиб ўлдириб, жараён видеосини ижтимоий тармоққа жойлаштирган эди. Овчининг ҳаракатлари жамоатчилик эътирозига сабаб бўлди.
Табиат ресурслари вазирлиги Атроф муҳит ва табиатни муҳофаза қилиш технологиялари илмий-тадқиқот институти бўлим бошлиғи Ўлмас Собировнинг айтишича, Бухоро буғусининг отилгани ҳақидаги миш-мишлар нотўғри. Аслида морхўр ҳайвони 2022 йил ноябрь ойида тегишли қонунчилик талабларига мувофиқ рухсатнома асосида, яъни ҳуқуқий жиҳатдан тўғри олинган.
2020 йилда қабул қилинган “Ов қилиш ва овчилик хўжалиги тўғрисида”ги Ўзбекистон Республикаси қонуни мавжуд. Ушбу қонуннинг 20-моддасига кўра республикамиздаги ҳар бир ёввойи ҳайвонот дунёси, ўсимликлар объектининг кадастр ҳисоботи юритилади. Қонунчилик талабларига мувофиқ берилган буюртма асосида шу ҳайвоннинг захираси қанчалик мавжудлиги ўрганиб чиқилади. Ўрганиб чиқилгач, табиатдан олиш мумкинлиги тўғрисида хулоса берилади. Вазирлар Маҳкамасининг қарори билан табиатдан бир дона ҳайвон ажратиб олинади.
