Ўзбекистонда қизамиқ кўпайяптими?

 

Ижтимоий тармоқларда Ўзбекистонда қизамиқ билан касалланганлар сони ортаётганлиги тўғрисидаги хабар тарқалди. Ҳолат бўйича Санитария-эпидемиологик осойишталик ва жамоат саломатлиги  қўмитаси расмий муносабат билдирди.

 

Маълум қилинишича, ҳозирда дунёнинг 150 дан ортиқ мамлакатида мураккаб эпидемиологик вазият сақланиб турибди. 2022 йил якуни бўйича дунё бўйича 155 минг ҳолатда қизамиқ касаллиги рўйхатга олинган.

 

Жорий йилнинг ўтган даври мобайнида фаол олиб борилган эпидемиологик суриштирувлар натижасида Ўзбекистонда 37 нафар беморларда қизамиқ касаллиги тасдиқланган.

 

Қизамиқ касаллиги бўйича мураккаб эпидемик вазиятни олдини олиш мақсадида  республикада 2022 йилнинг 16 ноябрь – 30 декабрь кунлари 6 ойликдан – 5 ёшгача бўлган болаларни қизамиқ-қизилчага қарши оммавий эмлашлар ўтказилган. Эмлаш тадбирлари натижасида режадаги 3 355 900 нафар болаларнинг 3 303 582 нафари ёки 98.4 фоизи эмлаш билан қамраб олинган ва ҳозирда ҳам эмлаш ишлари давом эттирилмоқда.

 

“Ҳозирда республикада касалликка қарши барча зарур профилактик чоралар кўрилмоқда, эпидемик вазият барқарор ва тўлиқ назоратга олинган”, — дейилади хабарда.