Янгийўлда Matiz маст эркакни уриб юборди
Шундан сўнг пиёда шифохонага ётқизилган.
Тошкент вилоятининг Янгийўл туманида Matiz ҳайдовчиси йўлдан ўтаётган пиёдани уриб юборди. Ҳолат юзасидан вилоят ИИББ ЙҲХБ маълумот берди.
Ҳодиса 27 апрель куни соат 17:30 ларда Янгийўл шаҳар Самарқанд кўчаси Деҳқон бозори қаршисида юз берган. Наманган вилоятида яшовчи, 1985 йилда туғилган Р.Р. йўлнинг пиёда учун белгиланмаган қисмидан югуриб ўтаётган вақтида шу кўча бўйлаб ҳаракатланиб келаётган ҳайдовчи — 1986 йилда туғилган A.Х. бошқарувидаги Matiz русумли автомашинанинг чап ён қисмига урилган.
ЙТҲ оқибатида пиёда турли хил енгил тан жароҳатлари олиб, шаҳар тиббиёт бирлашмасига ётқизилган. Шифокорларнинг маълум қилишича, пиёда йўлни кесиб ўтаётган вақтида маст ҳолда бўлган.
Ҳозирда ҳолат бўйича суриштирув ишлари олиб борилмоқда.
