Тошкентда «мойка» учун ташлаб кетилган Lacetti ўғирланди
20 ёшли йигит уни олиб қочиб, ЙТҲга учраган.
Тошкент шаҳрининг Сергели туманидаги автомошина ювиш шохобчасидан ўғирлаб кетилган Lacetti йўл-транспорт ҳодисасига учраган ҳолда топилди. Бу ҳақда ИИВ ҳузуридаги Тергов департаменти хабар бермоқда.
Қайд этилишича, 35 ёшли A.A. 23 апрель куни Сергели–5 даҳаси 2-метро бекати ёнида жойлашган автомашина ювиш шохобчаси ишчиси — Искандар исмли шахсга Lacetti русумли автоуловини ювиш учун калити билан ташлаб кетган. Эртаси куни у транспорт воситасини олиб кетиш учун шохобчага келган вақтида автомашина ҳамда Искандар исмли йигит бу ерда йўқлигини кўрган.
Олиб борилган тергов-тезкор ҳаракатлар натижасида мазкур жиноятни Андижон вилоятида яшовчи 20 ёшли У.И. содир этгани маълум бўлган. Жабрланувчига тегишли автомашина у томонидан Тошкент вилоятининг Оҳангарон туманида давлат рақамлари ечилган ва йўл транспорт ҳодисасига учраган ҳолда ташлаб кетилганлиги аниқланган.
Мазкур ҳолат юзасидан У.И.гa нисбатан Жиноят кодекснинг 267-моддаси 1-қисми (Транспорт воситасини олиб қочиш) билан жиноят иши қўзғатилган. Ҳозирда гумонланувчи У.И.ни қидириб топиш ишлари олиб борилмоқда. Тергов ҳаракатлари давом этмоқда.
