Жамоат транспортидаги камчиликлар сабаб айрим масъуллар ишдан кетди

 

1 май куни «Тошшшаҳартрансхизмат» АЖ бошқарув раиси, унинг ўринбосарлари ва автобус саройи раҳбарлари иштирокида сўнгги кунларда жамоат транспорти тизимида йўл қўйилаётган камчиликлар, ижтимоий тармоқларда муҳокамаларга сабаб бўлаётган муаммоларни бартараф этиш юзасидан  танқидий муҳокама йиғилиши ўтказилди.

 

Йиғилишда ўз хизмат вазифасига масъулиятсизлик билан ёндашгани, автобуслар ҳаракатини хавфсиз ташкил этиш чораларини кўриш бўйича ҳайдовчилар ўртасида етарли даражада йўриқнома ўтказиб тушунтириш ишларини олиб бормагани, автобусларда реклама баннерларини жойлаштирилиши ва бартараф этилишига совуққонлик билан ёндашгани ҳамда йўналишларга чиқариладиган автобус ва электробусларнинг иш тартибини тўғри ташкил этмаганлиги сабабли Автобус саройи масъул ходимларига қатъий чора кўрилиб, ходимлар билан тузилган меҳнат шартномаси бекор қилинган, айримларига ҳайфсан интизомий чораси кўрилган.

 

Жумладан, 2-Автобус саройи филиали директори ўринбосари ва ҳаракат хавфсизлигини назорат қилиш бўлими бошлиғи билан тузилган меҳнат шартномаси бекор қилинган, филиал директорига ҳайфсан интизомий чораси кўрилган.

 

1-Автобус саройи филиали директори ўринбосари билан тузилган меҳнат шартномаси бекор қилиниб, филиал директорига ҳайфсан интизомий чораси кўрилган.

 

7-Автобус саройи филиали директори ўринбосарига ҳайфсан интизомий чораси кўрилган. Реклама жойлаштириш бўйича масъул ходим билан тузилган меҳнат шартномаси бекор қилинган.

 

1-, 2-, 5-, 7-, 8-, 12-, ва 18-Автобус саройи филиаллари бош муҳандисларига ҳайфсан интизомий чораси кўрилган.