Фарғонада уйида кўкнори етиштирган шахс аниқланди
Ҳозирда унга нисбатан жиноят иши очилган.
Фарғона вилоятининг Учкўприк туманида яшаш хонадонида гиёҳвандлик ўсимликларни парваришлаб келаётган шахс аниқланди. Бу ҳақда вилоят ИИБ ахборот хизмати хабар бермоқда.
Жорий йилнинг 19 апрель куни ўтказилган тезкор тадбир давомида туманнинг «Фаровон» МФЙ ҳудудида яшовчи Н.Н.нинг уйи холислар иштирокида кўздан кечирилган. Унинг томорқасида 27 туп кўкнори ўсимликлари парваришлаб келинаётгани аниқланиб, далилий ашё сифатида олинган.
Ҳозирда ҳолат юзасидан Жиноят кодексининг 270-моддаси 1-қисми билан жиноят иши қўзғатилиб, тергов ҳаракатлари олиб борилмоқда.
Қонунчиликка кўра, мазкур жиноятни содир этган шахс уч йилгача озодликдан маҳрум қилиш билан жазоланиши мумкин.
