АҚШнинг жанубий чегараларига бир ярим минг аскар юборилади
Бу ҳақда мамлакат мудофаа вазири маълум қилди.
АҚШ мудофаа вазири Ллойд Остин бир ярим минг ҳарбийни мамлакатнинг жанубий чегарасига юборишга рухсат берди. Улар америкалик чегарачилар ишига кўмаклашади.
"Ички хавфсизлик вазирлиги сўровига кўра Остин чегара-божхона хизматига ёрдам берувчи ҳарбийлар сонини вақтинча оширишга рухсат берди", — дейилади Пентагон хабарида.
Ҳарбийлар 90 кун давомида чегарачиларга қуруқликдаги вазиятни назорат қилиш, омборхоналарни қўриқлаш ва бошқа соҳаларда кўмаклашади.
2021 йил ноябридан Америка ҳукумати мамлакатга келаётган чет элликлардан COVID-19'га қарши вакцина талаб қилаётган эди. Шу сабаб билан минглаб муҳожирлар мамлакатга киритилмаган. Аммо 12 майдан эмланганлик ҳақидаги ҳужжат талаб қилинмайди. Бу эса чет элликлар оқимини кучайтиради.
