Nemolchi.uz лойиҳаси муаллифи Ўзбекистонни вақтинча тарк этди

 

Зўравонликка қарши курашувчи Nemolchi.uz лойиҳаси асосчиси Ирина Матвиенко унга номаълум шахслар ўлим билан таҳдид қилгани сабабли Ўзбекистонни вақтинча тарк этганини маълум қилди. У бу ҳақда ҳуқуқ-тартибот идораларига ҳам ариза билан мурожаат йўллаган.

 

Ўзбекистонда зўравонликка қарши курашувчи Nemolchi.uz лойиҳаси асосчиси Ирина Матвиенко ўзининг Facebook`даги саҳифасида унга ўлим билан таҳдид қилингани, шу сабабли бир муддат мамлакатни тарк этганини билдирди.

 

«Ўлим билан таҳдид қилинганидан кейин хатти-ҳаракатларим ўзгарди. Мен буни кимнингдир аҳмоқона ҳазилидек қабул қилишга ҳаракат қилдим, лекин подъездга кириш, коридор бўйлаб офисга бориш қўрқинчли бўлиб қолди. Ичкарига кириб, қўлимда учи ташқарига қараган (йўналтирилган) калит билан масофадан туриб ҳар бир бурчакни кўздан кечирдим. Зинадан лифтда эмас, пиёда юқорига ва пастга тушиб чиқдим. Эримдан майдончамизга чироқ ўрнатишни, умумий эшикка қулф осиб қўйишини сўрадим», — деб ёзади у.

 

Муаллиф таҳдидли хабарларни психологга кўрсатган, у хабарнинг ёзилиш услубини руҳий касал одамникига ўхшаш деб баҳолаган.

 

Ирина Матвиенко психолог билан маслаҳатлашганидан сўнг Ўзбекистондан бир неча ҳафтага Грузияга кетишга қарор қилган. «Мен, албатта, тез орада қайтиб келаман деб ўйлайман. Ҳозирча хавфсиз жойда тинчланиб олишим керак», — дея хулоса қилди у.

 

Ирина Матвиенко изоҳида, шунингдек, 28 апрель куни таҳдидлар келиб тушгани юзасидан ИИВга мурожаат қилганини айтган.