Тошкентда аёл қизининг синф раҳбарини калтаклади
Ҳозирда ҳолат юзасидан суриштирув ўтказилмоқда.
Ижтимоий тармоқда Тошкент шаҳрининг Чилонзор туманида мактаб ўқитувчиси ва ўқувчининг онаси ўртасида жанжал юз бергани айтилган хабар тарқалди. Ҳолат юзасидан шаҳар мактабгача ва мактаб таълими бошқармаси расмий муносабат билдирди.
Воқеа 1 май куни Чилонзор туманидаги 178-сонли умумтаълим мактабида содир бўлган. Шу мактабнинг 4-синф раҳбар ўқитувчиси ва шу синфда ўқийдиган қизнинг онаси ўртасида можаро юзага келган.
Айни пайтда ҳолат Тошкент шаҳар мактабгача ва мактаб таълими бошқармаси назоратига олинган. Ўқитувчи томонидан Чилонзор туман ИИО ФМБга мурожаат қилинган. Ҳозирда ҳуқуқ-тартибот ходимлари томонидан суриштирув ишлари давом этмоқда.
“Тегишли ташкилотлар юқоридаги ҳолат бўйича бефарқ эмас. Ўрганиш ишлари олиб борилмоқда ва якунлари бўйича батафсил маълумот берилади”, — дейилади хабарда.
