ДХХ пора олаётган мансабдорларни қўлга туширди
Бу бўйича 2 та вилоятда тезкор тадбир ўтказилган.
ДХХ мансабдор шахсларни ашёвий далиллар билан қўлга олди, дея хабар бермоқда “ЎзА” ахборот агентлиги.
Наманган вилояти туманларидан бирининг фермерлар кенгаши раиси тадбиркорлик билан шуғулланмоқчи бўлган фуқарога тумандаги машина трактор паркининг 30 сотих ер майдонини унинг номига расмийлаштириб бериш эвазига 50 минг АҚШ доллари талаб қилган.
ДХХ ходимлари томонидан ўтказилган тезкор тадбирда мазкур мансабдор шахс сўралган пулни олган вақтида ашёвий далиллар билан ушланган.
Жиззах вилоятидаги туманлардан бирининг архитектура ва қурилиш бўлими бошлиғи танлов савдоларини ўтказиш бўйича вилоят комиссияси баённомасига асосан танлов ғолиби деб топилган хусусий корхонага савдо дўкони қуриши учун ажратилган 56 кв.М ер майдонида тегишли ишларни амалга оширишда зарур бўладиган ҳужжатларни тайёрлашда ёрдам бериш эвазига корхона раҳбаридан 3 минг АҚШ доллари талаб қилган.
ДХХ томонидан ўтказилган тезкор тадбирда, у сўралган пулдан 2 минг АҚШ долларини олган вақтида ушланган.
