Тошкентда одам ўғрилари ушланди
Улар ЙПХ ходими формасида жиноят содир этган.
Тошкент шаҳрида ЙПХ ходими формаси ва ниқобда одам ўғирлаган жиноий гуруҳга суд ҳукми ўқилди. Бу ҳақда Тошкент шаҳар судлари хабар берди.
Жиноят ишлари бўйича Олмазор туман судининг ҳукми билан 1980 йилда туғилган cудланувчи ЖКнинг 137-моддаси (одам ўғирлаш) 2-қисмининг “б, В” бандлари, 28,164-моддаси (босқинчиликда ташкилотчи) 2-қисмининг “а, б, В” бандлари, 165-моддаси (товламачилик) 3-қисмининг “а” банди, 28,267-моддаси (транспорт воситасини олиб қочишда ташкилотчи) 2-қисмининг “б, В” бандларида назарда тутилган жиноятларни содир қилганликда айбли деб топилди ва 15 йил озодликдан маҳрум қилинган.
Қолган уч нафар судланувчилар “одам ўғирлаш”, “босқинчилик”, “товламачилик”, “транспорт воситасини олиб қочиш” жиноятларни содир қилганликда айбли деб топилган. 1997 йилда туғилган cудланувчига 13 йил 6 ой, ва 1981 йилда туғилган судланувчига 13 йил 9 ой, 1994 йилда туғилган cудланувчига эса 14 йил озодликдан маҳрум қилиш жазоси тайинланди. Судланувилардан солидар тартибда жабрланувчи фойдасига 437 139 548 сўм ундирилиши белгиланган.
