Ким Чен Ин ҳарбий разведка сунъий йўлдоши учирилишини тасдиқлади
КХДР раҳбари буни миллий хавфсизлик талаби дея изоҳлаган.
Шимолий Корея етакчиси Ким Чен Ин мамлакатнинг биринчи разведка сунъий йўлдошини учиришга тайёргарлик ишлари билан танишди ва бу масала билан шуғулланувчи махсус қўмита иш режасини тасдиқлади.
Ким Чен Иннинг сўзларига кўра, ҳарбий разведка сунъий йўлдошининг муваффақиятли учирилиши ҳозирги миллий хавфсизлик ҳолатининг долзарб талаби бўлиб, бу космик фан ва техника тараққиётида сезиларли силжишни кўрсатмоқда.
“АҚШ империалистлари ва Жанубий Корея қўғирчоқ тўдасининг КХДРга қарши қарама-қаршилик интригалари қанчалик умидсиз бўлса, биз суверенитетимиз ва ўзимизни ҳимоя қилиш ҳуқуқимиздан шунчалик муносиб фойдаланамиз”, — дея қўшимча қилган у.
Эслатиб ўтамиз, 19 апрель куни Ким Чен Ин Пхеняннинг маълумотлар йиғиш имкониятларини ошириш учун биринчи разведка сунъий йўлдошини учиришга тайёргарлик кўришга буйруқ берган. Бундан бир ҳафта олдин Шимолий Корея биринчи марта «Хвасон-18» қитъалараро баллистик ракетасини учирди.
