Ўзбекистонда 60 ёшдан ошганларга хавфли дори бериляптими?
ССВ тармоқда тарқалган хабарларга муносабат билдирди.
Ижтимоий тармоқларда Ўзбекистон Хитойдан катта миқдорда дори воситалари сотиб олгани, таблетка кўринишидаги ушбу препаратлар мамлакат бўйлаб 60 ёшдан ошган аҳоли вакилларига берилиши, аммо улар инсон организми учун хавфли экани ҳақида хабарлар тарқалмоқда. Соғлиқни сақлаш вазирлиги ҳолатга расмий муносабат билдирди.
Маълум қилинишича, Ўзбекистонга Хитой давлатидан катта миқдорда дори воситалари олиб келингани ҳақидаги хабарлар мутлақо ёлғон.
Қолавера, бундан 2 йил аввал мамлакатда коронавирус пандемияси айни авж олган оғир ва мураккаб даврда ҳам интернет тармоқларида COVID-19 инфекциясига қарши ишлаб чиқарилган вакциналар тўғрисида шу сингари ҳақиқатга зид маълумотлар тарқатилган. Бироқ орадан вақт ўтиб, ушбу хабарлар мутлақо уйдирма экани маълум бўлган.
“Шу маънода айтсак, одамлар орасида турли ваҳима ва хавотир уйғотиш мақсадида тарқатилаётган бу галги хабарлар ҳам бўхтон ва сафсатадан бошқа нарса эмас”, — дейилади хабарда.
