«Масс-медиа соҳасига оид 100 савол» лойиҳаси тақдимоти бўлиб ўтди
Онлайн платформа Миллий Масс-медиани қўллаб-қувватлаш ва ривожлантириш жамоат фонди ҳамда Швейцария тараққиёт ва ҳамкорлик Агентлиги билан биргаликда ишлаб чиқилди.
Мазкур лойиҳа ОАВ ташкил этиш истагида бўлган, лекин ОАВни рўйхатдан ўтказиш ва фаолиятини ташкил этиш тартибини билмайдиган, шунингдек, бу борада қайси ташкилотга мурожаат қилиш кераклиги ҳақида аниқ тасаввурга эга бўлмаган фуқаролар (блогерлар, ташаббускор гуруҳлар) тоифасига мўлжалланган.
«Ушбу лойиҳа учун саволлар тўғридан-тўғри амалий тажрибага эга бўлган журналист ва блогерлардан тўпланган. Унинг асосий мақсади ОАВ ходимларининг ҳуқуқий саводхонлигини ошириш орқали миллий медиа лойиҳаларининг мустақиллигини мустаҳкамлашга кўмаклашишдан иборат», — деди Масс-медиа фонди Васийлик кенгаши раиси Нозима Давлетова.
Лойиҳа доирасида тўпланган барча саволлар “Legalmax” юридик фирмаси ҳуқуқшунослари томонидан умумлаштирилиб, тизимлаштирилган.
Маълумотларни излаш қулай бўлиши учун жавоблар 5 та алоҳида тематик блокларга бўлинган ҳолда Миллий Масс-медиани қўллаб-қувватлаш ва ривожлантириш жамоат фондининг веб-сайтида ўзбек ва рус тилларида берилган.
Келажакда Android ва iOS тизимлари учун мобил илова ва Телеграм боти ишга туширилиши маълум қилинди.
