Шавкат Мирзиёев “Air Products” бош ижрочи директори билан учрашди
Учрашувчда компания билан амалий ҳамкорликни кенгайтириш масалалари кўриб чиқилган.
Бугун, 26 май Ўзбекистон Республикаси Президенти Шавкат Мирзиёев “Air Products” компанияси бош ижрочи директори Сейфи Гасемини қабул қилди.
Ўзбекистон иқтисодиётининг стратегик тармоқларида юқори технологик лойиҳаларни илгари суришда АҚШнинг ўз йўналишида глобал етакчи бўлган ушбу компанияси билан амалий ҳамкорликни янада кенгайтириш масалалари кўриб чиқилди.
Давлат раҳбари компания раҳбарини 1 миллиард доллар миқдорида тўғридан-тўғри инвестицияларни жалб қилган ҳолда Қашқадарё вилоятидаги “GTL” заводининг учта саноат газ ускунасини харид қилиш бўйича келишув муваффақиятли якунлангани ва тегишли битим имзолангани билан табриклади.
“Air Products” яна бир йирик лойиҳада – камида 700 миллион долларлик инвестицияларни жалб қилган ҳолда Бухоро вилоятида MTO технологияси асосида газ-кимё мажмуаси қурилишида иштирок этаётгани қайд этилди.
Мамлакатда “яшил” водород соҳасини ривожлантириш бўйича яна бир асосий ҳамкор - Саудия Арабистонининг “ACWA Power” компанияси иштирок этаётган истиқболли лойиҳаларга алоҳида эътибор қаратилди.
Амалга оширилаётган лойиҳалар доирасида юқори малакали мутахассисларни тайёрлаш муҳимлиги алоҳида таъкидланди.
