“Али бобо ва қирқ қароқчи” фильмининг янги талқини яратилади
Уни суратга олишнинг амалий масалалари июлда кўриб чиқилади.
Ўзбекистон, Россия ва Ҳиндистон биргаликда “Али бобо ва қирқ қароқчи” фильмининг замонавий талқинини яратади. Бу ҳақда Кинематография агентлиги маълум қилди.
Агентлик ва «Ўзбекфилм» давлат унитар корхонаси раҳбариятининг россиялик режиссёр Жаҳонгир Файзиев ва ҳиндистонлик режиссёр ва сценарийлар муаллифи Умеш Меҳра билан онлайн-учрашуви бўлиб ўтди.
Унда Ўзбекистон-Россия-Ҳиндистон ҳамкорлигидаги лойиҳа – афсонавий “Али бобо ва қирқ қароқчи” фильмининг замонавий талқинини яратиш фикри кўриб чиқилди. Шунингдек, ташкилий масалалар, акторларни танлаш ва фильмнинг тахминий буджети муҳокама қилинди.
Жаҳонгир Файзиев 1979 йилда суратга олинган “Али бобо ва қирқ қароқчи” фильми режиссёри Латиф Файзиевнинг жияни ҳисобланади.
Учрашувда суратга олиниши режалаштирилган картина камбағал ўтинчи Али Бобо ҳақидаги афсонанинг биринчи қисмини давом эттириш ва замонавий талқинда суратга олиниш кераклиги қайд этилди.
Кинолентани яратишнинг барча амалий масалаларини июль ойида кўриб чиқишга келишиб олинди.
